JAWA ILANG KUMANDHANGE

(Dening Surti Alfiah lan Ki Sugeng Subagyo )

 

Sunaring surya ngungak lumahing bumi ing wanci enjing,

Datan keprungu malih jago kluruk lan pangocehe kukila saut sinautan,

Datan keprungu malih swara lesung katerak alu dening kenya padhusunan,

Datang keprungu malih panggeriting tali timba,

Kabeh wus ginanti dening alarm android,

Adang ilang ginanti dening magic com,

Tali timba nganggur ginanti pompa banyu,

Ngendel toya damel wedang kantun mencet kenop teko listrik,

 

Nalika sang bagaskara ndedel manginggil,

Wancine bedhug ndhrandhang ngumandhang,

Panasing surya karasa ing hangga tanpa kinira,

Nyaru swarane kebo lan sapi uwal saka pasangan,

Iku kahanan duk semana,

Saiki wus ilang,

Gathiking pacul lan gathul tumanjem bantala,

 Uga melu sirna,

Among kisma den prayoga,

Tanpa gobyos kringet dudu mangsane,

Garu luku ginanti dening traktor,

 

Ing kana,

Pasar punjering dol tinuku,

Sirna ilang kumandhange,

Bakul tanpa tawa-tawa,

Sing tuku ora bisa nganyang,

Bakul lan sing tuku tanpa srawung,

Regane dagangan kabeh tinulis,

Gelem ya tukua, yen ora gelem ora dadi ngapa,

 

Pandulu tumuju ing redi gung,

Grobak,

Andhong,

Cikar,

Becak,

Sepedha,

Kabeh ginusur dening mobil lan montor,

Wong mbecak kalah karo tukang ojek,

Wong ngojek kalah karo ojol,

 

Wancine surup surya,

Srengenge angslup kemulan bantala,

Swara ngaji diganti siaran televisi,

Pagelike gendhing,

Wacan koran,

Sinau calistung,

Rembug somah,

Kabeh mung kari tilas,

Sak omah kabeh ora ana sing uwal,

Nguwali karsa,

Keli iline teknologi tilpon pinter,

 

Nalika wengi tansaya dalu,

Mesthine ana kidung rumeksa ing wengi,

Mesthine sasadara manjer kawuryan,

Mesthine aburing konang mbabar sunar kaendahan,

Mesthine kartika melok ing angkasa,

Kabeh wis kalindhih,

Kasoran dening sunaring lampu listrik mblerengi,

 

Kidung wengi,

Jethungan,

Gobak sodor,

Sundhah mandha,

Lepetan,

Dadi barang aneh tanpa ditepungi bocah,

Anane mung sajuga,

bocah dolanan game internet ing senthonge dhewe-dhewe

 

Kudune,

Sing tuwa nresnani wiranom,

Wiranom bekti marang wong tuwa,

Ananging,

Basa krama wis ora ana,

Tulisan Jawa hanacaraka musna,

Malah Jawa dadi ora beda.